Sustainable Finance | Financial Literacy | Sustainable Future
एसियाको वित्तीय हब बन्न हङकङ र सिंगापुरबीच बढ्दो प्रतिस्पर्धा
मंगलबार, १६ भदौ २०८३, दिउँसो १:३६
एसियाको प्रमुख वित्तीय केन्द्र बन्न हङकङ र सिंगापुरबीच लामो समयदेखि जारी प्रतिस्पर्धा पछिल्लो समय झनै तीव्र बनेको छ। विश्वव्यापी पूँजी, लगानी, सम्पत्ति व्यवस्थापन, वित्तीय प्रविधि र अन्तर्राष्ट्रिय कम्पनी आकर्षित गर्ने दौडमा दुवै शहरले आफ्नो वित्तीय पूर्वाधार र नीतिगत आकर्षण विस्तार गरिरहेका छन्।
ब्लुमबर्गका अनुसार, हङकङ र सिंगापुरबीचको पुरानो प्रतिस्पर्धा अहिले नयाँ चरणमा प्रवेश गरेको छ। दुवै शहर एसियाको शीर्ष वित्तीय हब बन्ने लक्ष्यसहित लगानीकर्ता, वित्तीय संस्था, फन्ड व्यवस्थापक र दक्ष जनशक्ति आकर्षित गर्न प्रतिस्पर्धात्मक नीति अघि बढाइरहेका छन्।
हङकङको बलियो आधार चीनसँगको सम्बन्ध
हङकङको सबैभन्दा ठूलो प्रतिस्पर्धात्मक फाइदा चीनको विशाल पूँजी बजारसँगको प्रत्यक्ष सम्बन्ध हो। चीन र विश्वका अन्य बजारबीच पूँजी प्रवाहका लागि हङकङ महत्वपूर्ण वित्तीय प्रवेशद्वारका रूपमा स्थापित छ।
पछिल्लो समय हङकङको सेयर बजारमा ठूला आईपीओ र चीनसँग सम्बन्धित वित्तीय कारोबार बढिरहेका छन्। रोयटर्सका अनुसार, विश्वव्यापी फास्ट–फेसन कम्पनी शेनले हालै हङकङमा आईपीओमार्फत करिब १.७४ अर्ब अमेरिकी डलर जुटाएको छ। कम्पनीको हङकङ स्टक एक्सचेन्जमा प्रवेशलाई शहरको विश्वव्यापी पूँजी बजारको आकर्षण पुनः बलियो बनाउने महत्वपूर्ण घटनाका रूपमा हेरिएको छ।
हङकङले वित्तीय सेवा, सम्पत्ति व्यवस्थापन, कोष व्यवस्थापन र फिनटेकमा पनि आफ्नो स्थिति बलियो बनाउँदै आएको छ।
सिंगापुरको रणनीति–प्रविधि र प्रतिभा
हङकङको प्रतिस्पर्धीका रूपमा सिंगापुरले भने स्थिर नियमन, व्यवसायमैत्री वातावरण, दक्षिणपूर्वी एसियाली बजारमा पहुँच र वित्तीय प्रविधिलाई आफ्नो मुख्य शक्ति बनाएको छ।
यसैक्रममा सिंगापुरको केन्द्रीय बैंक मौद्रिक प्राधिकरण सिंगापुर (MAS) ले आगामी तीन वर्षमा फिनटेक तथा वित्तीय प्रविधि विकासका लागि २२० मिलियन सिंगापुर डलर अर्थात् करिब १७३ मिलियन अमेरिकी डलर लगानी गर्ने घोषणा गरेको छ।
रोयटर्सका अनुसार, उक्त लगानीले वित्तीय क्षेत्रमा प्रविधिको प्रयोग, नयाँ डिजिटल वित्तीय सेवा, कृत्रिम बुद्धिमत्ता र दक्ष जनशक्ति विकासलाई प्रोत्साहन गर्नेछ।
यसबाट सिंगापुरले वित्तीय केन्द्रका रूपमा आफ्नो प्रतिस्पर्धात्मक क्षमता कायम राख्न फिनटेक र एआईलाई प्रमुख रणनीतिक क्षेत्र बनाएको देखिन्छ।
विश्व वित्तीय केन्द्रको सूचीमा दुवै शीर्ष स्थानमा
दुवै शहरको प्रतिस्पर्धा कति नजिक छ भन्ने कुरा ग्लोबल फाइनान्सियल सेन्टर्स इन्डेक्स (GFCI) ले पनि देखाउँछ।
सन् २०२६ को GFCI ३९ अनुसार न्युयोर्क ७६७ अंकसहित पहिलो, लन्डन ७६६ अंकसहित दोस्रो, हङकङ ७६५ अंकसहित तेस्रो र सिंगापुर ७६४ अंकसहित चौथो स्थानमा छन्। अर्थात् हङकङ र सिंगापुरबीच केवल एक अंकको अन्तर छ।
यसले दुवै शहरबीचको प्रतिस्पर्धा अत्यन्तै नजिक रहेको देखाउँछ।
प्रतिस्पर्धा अब बैंकिङमा मात्र सीमित छैन
हङकङ र सिंगापुरबीचको प्रतिस्पर्धा परम्परागत बैंकिङ तथा सेयर बजारमा मात्र सीमित छैन। अहिले सम्पत्ति व्यवस्थापन, हेज फन्ड, प्राइभेट इक्विटी, फिनटेक, डिजिटल सम्पत्ति, एआई, हरित वित्त र वित्तीय प्रतिभा आकर्षित गर्ने विषय पनि प्रतिस्पर्धाको केन्द्र बनेका छन्।
हङकङले चीनसँगको सम्बन्ध र अन्तर्राष्ट्रिय पूँजी बजारलाई आफ्नो मुख्य आधार बनाइरहेको छ भने सिंगापुरले दक्षिणपूर्वी एसिया, प्रविधि, नियामकीय स्थिरता र वित्तीय नवप्रवर्तनलाई प्राथमिकता दिएको छ।
यसरी दुवै शहरले फरक–फरक रणनीतिबाट एउटै लक्ष्य पछ्याइरहेका छन्—एसियामा विश्वव्यापी पूँजी र वित्तीय कारोबारको प्रमुख केन्द्र बन्ने।
आगामी दशकमा को अगाडी ?
हालको तथ्यांकले हङकङलाई केही अगाडि देखाए पनि दुवैबीचको अन्तर अत्यन्तै सानो छ। त्यसैले आगामी वर्षहरूमा नीतिगत सुधार, वित्तीय प्रविधि, पूँजी बजारको गहिराइ, लगानीकर्ताको विश्वास र दक्ष जनशक्ति आकर्षणले विजेता निर्धारण गर्ने सम्भावना छ।
यस अर्थमा हङकङ–सिंगापुर प्रतिस्पर्धा केवल दुई शहरबीचको दौड होइन। यो एसियामा वित्तीय शक्ति र विश्वव्यापी पूँजीको केन्द्र आगामी दशकमा कहाँ रहनेछ भन्ने ठूलो प्रतिस्पर्धासमेत हो।
प्रतिक्रिया 0