Sustainable Finance | Financial Literacy | Sustainable Future
२०४० सम्म तीन देशले ओगट्नेछन् विश्व अर्थतन्त्रको आधाभन्दा बढी हिस्सा
विश्व अर्थतन्त्र २२७ ट्रिलियन डलर पुग्ने
शुक्रबार, २० कार्तिक २०८३, राति ९:५४
काठमाडौं । विश्व अर्थतन्त्र आगामी डेढ दशकमा उल्लेख्य रूपमा विस्तार हुने प्रक्षेपण गरिएको छ। सन् २०२६ मा करिब १२६ ट्रिलियन अमेरिकी डलर रहेको विश्व अर्थतन्त्रको आकार सन् २०४० सम्ममा २२७ ट्रिलियन डलर पुग्ने अनुमान गरिएको छ। यसअनुसार आगामी १४ वर्षमा विश्व अर्थतन्त्रको आकार करिब ८० प्रतिशतले बढ्नेछ।
भिजुअल क्यापिटलिस्टले सेन्टर फर इकोनोमिक्स एन्ड बिजनेस रिसर्च (CEBR) को ‘वर्ल्ड इकोनोमिक लिग टेबल २०२६’ मा आधारित रहेर सार्वजनिक गरेको विश्लेषणअनुसार सन् २०४० मा विश्वका १९० अर्थतन्त्रको आर्थिक आकार र वरीयताको प्रक्षेपण गरिएको छ। यसले आगामी वर्षहरूमा विश्व अर्थतन्त्रको शक्ति सन्तुलनमा परिवर्तन आउन सक्ने देखाएको छ।
सन् २०२६ मा विश्व अर्थतन्त्रको आकार करिब १२६ ट्रिलियन डलर पुग्ने अनुमान छ। सन् २०२५ को तुलनामा पनि विश्व अर्थतन्त्र विस्तार हुने क्रममा छ। तर आगामी दशकमा आर्थिक वृद्धिको गति र विभिन्न देशको आर्थिक प्रदर्शनअनुसार विश्व अर्थतन्त्रमा देशहरूको स्थानसमेत परिवर्तन हुने देखिन्छ।
अमेरिका पहिलो, चीन दोस्रो
प्रक्षेपणअनुसार सन् २०४० मा पनि अमेरिका विश्वकै सबैभन्दा ठूलो अर्थतन्त्रका रूपमा रहनेछ। अमेरिकाको अर्थतन्त्र ५२.८५ ट्रिलियन डलर पुग्ने अनुमान छ। विश्व अर्थतन्त्रमा अमेरिकाको हिस्सा २३.३ प्रतिशत हुनेछ।
त्यस्तै, चीन ४७.८८ ट्रिलियन डलरको अर्थतन्त्रसहित दोस्रो स्थानमा रहनेछ। विश्व अर्थतन्त्रमा चीनको हिस्सा २१.१ प्रतिशत पुग्ने अनुमान छ। यसअनुसार अमेरिका र चीनबीचको आर्थिक आकारको अन्तर घट्दै करिब ५ ट्रिलियन डलरमा सीमित हुनेछ।
यसले विश्व अर्थतन्त्रमा अमेरिकाको अग्रता कायम रहे पनि चीनले त्यसलाई क्रमशः चुनौती दिँदै जाने संकेत गर्छ।
भारत तेस्रो ठूलो अर्थतन्त्र बन्ने
यस प्रक्षेपणको अर्को महत्त्वपूर्ण पक्ष भारतको आर्थिक उछाल हो। भारत सन् २०४० सम्म विश्वको तेस्रो ठूलो अर्थतन्त्र बन्ने अनुमान गरिएको छ। भारतको अर्थतन्त्र १४.०९ ट्रिलियन डलर पुग्ने र विश्व अर्थतन्त्रमा यसको हिस्सा ६.२ प्रतिशत रहने प्रक्षेपण छ।
भारतले जर्मनी र जापानजस्ता विकसित अर्थतन्त्रलाई पछि पार्दै तेस्रो स्थान हासिल गर्ने अनुमान गरिएको हो। त्यस्तै, इन्डोनेसिया पनि उल्लेख्य रूपमा अघि बढ्दै आठौँ ठूलो अर्थतन्त्र बन्नेछ। यसको अर्थतन्त्र ४.१८ ट्रिलियन डलर पुग्ने अनुमान छ।
इन्डोनेसियाको उछाल, इटाली शीर्ष १० बाट बाहिरिने
सन् २०४० सम्म इन्डोनेसियाले पनि उल्लेखनीय आर्थिक प्रगति गर्ने अनुमान छ। हालको तुलनामा निकै माथि उक्लिएर इन्डोनेसिया आठौँ ठूलो अर्थतन्त्र बन्ने प्रक्षेपण गरिएको छ। त्यस्तै, इटाली ११औँ स्थानमा झर्नेछ। स्पेन, दक्षिण कोरिया, अस्ट्रेलिया र मेक्सिको पनि विश्वका शीर्ष २० अर्थतन्त्रमा रहनेछन्।
विश्व अर्थतन्त्रमा नेपालको अवस्था
नेपालको अर्थतन्त्र पनि आगामी डेढ दशकमा विस्तार हुने प्रक्षेपण गरिएको छ। CEBR का अनुसार सन् २०२५ मा विश्वका अर्थतन्त्रमध्ये १०२औँ स्थानमा रहेको नेपाल सन् २०४० सम्म ९०औँ स्थानमा उक्लिने अनुमान छ। यस अवधिमा नेपालको कुल गार्हस्थ्य उत्पादन (जीडीपी) ४५ अर्ब डलरबाट बढेर ११९ अर्ब डलर पुग्ने प्रक्षेपण गरिएको छ।
नेपालको आर्थिक वृद्धिदर सन् २०२६ देखि २०३० सम्म औसत ५ प्रतिशत र त्यसपछिका नौ वर्षमा औसत ४.६ प्रतिशत रहने अनुमान गरिएको छ। यसअनुसार १५ वर्षमा नेपालको विश्व आर्थिक वरीयतामा १२ स्थान सुधार हुने देखिन्छ।
तीन देशले ओगट्नेछन् विश्व अर्थतन्त्रको आधाभन्दा बढी हिस्सा
सन् २०४० सम्म अमेरिका, चीन र भारतले मात्रै विश्व अर्थतन्त्रको करिब ५०.६ प्रतिशत हिस्सा ओगट्ने प्रक्षेपण छ। यी तीन देशको संयुक्त अर्थतन्त्र ११४.८ ट्रिलियन डलर पुग्नेछ। यसले आगामी दशकमा विश्व आर्थिक गतिविधिको केन्द्र यी तीन ठूला अर्थतन्त्रमा थप केन्द्रित हुन सक्ने देखाउँछ।
आगामी डेढ दशकमा विश्व अर्थतन्त्रको आकार विस्तारसँगै आर्थिक शक्ति सन्तुलनमा पनि परिवर्तन आउने देखिएको छ। विशेषगरी एसियाली अर्थतन्त्रको बढ्दो प्रभाव, भारतको उदीयमान आर्थिक शक्ति र चीनसँगको अमेरिकी प्रतिस्पर्धाले विश्व अर्थतन्त्रको आगामी दिशा निर्धारण गर्नेछन्।
प्रतिक्रिया 0