Sustainable Finance | Financial Literacy | Sustainable Future
सामाजिक सञ्जाल मुद्दामा मेटाले १६.७ अर्ब डलर तिर्ने
बिहीबार, ११ भदौ २०८३, बिहान १०:३२
काठमाडौं । फेसबुक र इन्स्टाग्रामको प्रयोगबाट बालबालिका तथा किशोरकिशोरीमा परेको असरसम्बन्धी मुद्दा टुंग्याउन मेटाले अमेरिकी राज्यहरूलाई १६.७ अर्ब डलरसम्म तिर्न सहमति जनाएको छ। अदालतमा बुधबार दायर गरिएको कागजातअनुसार यो सम्झौता सामाजिक सञ्जाल कम्पनीविरुद्धको महत्वपूर्ण मुद्दामध्ये एक हो।
ब्लुमबर्गका अनुसार, अमेरिकाका २९ राज्यका महान्यायाधिवक्ताहरूले मेटामाथि फेसबुक र इन्स्टाग्रामलाई युवाहरूमा बाध्यकारी तथा अत्यधिक प्रयोग बढाउने गरी डिजाइन गरेको आरोप लगाएका थिए। उनीहरूले कम्पनीले बालबालिकाको सुरक्षा र गोपनीयतासम्बन्धी कानुन उल्लंघन गरेको दाबी गरेका थिए। मुद्दामा मेटाले आरोप अस्वीकार गर्दै सम्झौता कुनै गल्ती स्वीकार गरेको अर्थ नलाग्ने बताएको छ।
सम्झौताअनुसार मेटाले फेसबुक र इन्स्टाग्राममा किशोरकिशोरीको प्रयोग समय सीमित गर्ने, निश्चित समयमा प्लेटफर्मको पहुँच रोक्ने तथा अभिभावकको स्वीकृतिबिना केही सुरक्षा सेटिङ परिवर्तन गर्न नदिने व्यवस्था लागू गर्नेछ। यसबाट कम्पनीको प्लेटफर्म सञ्चालन प्रणालीमै महत्वपूर्ण परिवर्तन हुने अपेक्षा गरिएको छ।
मेटाले मुख्य मुद्दाको समाधानका लागि १६.७ अर्ब डलरसम्म तिर्नेछ। यसबाहेक अन्य गोपनीयता दाबी समाधान गर्न करिब ४५ करोड ९३ लाख डलर र कानुनी शुल्कका लागि ७ करोड ५० लाख डलर तिर्ने सम्झौता भएको छ। टेक्साससँग छुट्टै सम्झौताअन्तर्गत मेटाले थप १ अर्ब डलरसम्म तिर्नेछ।
यो मुद्दा मेटाका लागि ठूलो कानुनी जोखिमका रूपमा हेरिएको थियो। ब्लुमबर्गका अनुसार मुद्दा हार्दा विभिन्न राज्यका दाबी र जरिवाना जोडिएर कम्पनीमाथि १.४ ट्रिलियन डलरसम्मको सम्भावित दायित्व आउन सक्ने मेटाकै अनुमान थियो। सम्झौता भएपछि भने अदालतमा जारी परीक्षण टुंगिएको छ।
सम्झौताले फेसबुक र इन्स्टाग्रामको किशोर प्रयोगकर्ता सुरक्षा नीतिमा व्यापक परिवर्तन ल्याउने देखिएको छ। यद्यपि सम्झौता कार्यान्वयनका लागि अदालतको स्वीकृति आवश्यक रहनेछ।
प्रतिक्रिया 0