Sustainable Finance | Financial Literacy | Sustainable Future
संयुक्त राष्ट्रसङ्घको महासभामा ट्रम्पको सम्बोधन
इरान युद्धदेखि विश्व शान्तिसम्म
मंगलबार, ६ आश्विन २०८३, राति ८:४३
अमेरिकी राष्ट्रपति डोनाल्ड ट्रम्पले संयुक्त राष्ट्रसङ्घको ८१औँ महासभालाई सम्बोधन गर्दै अमेरिकी विदेश नीति, इरानसँगको युद्ध, विश्व शान्ति र संयुक्त राष्ट्रसङ्घको भूमिकाबारे आफ्नो धारणा प्रस्तुत गरेका छन्। न्युयोर्कमा जारी महासभाको उच्चस्तरीय छलफलका क्रममा ट्रम्पले इरानलाई आणविक हतियार विकास गर्नबाट रोक्न अमेरिकी सैन्य कारबाही आवश्यक भएको दाबी गरेका छन्।
ट्रम्पले इरानसँगको युद्धलाई आफ्नो प्रशासनले सामना गरेको प्रमुख सुरक्षा चुनौतीका रूपमा प्रस्तुत गर्दै इरानले आणविक हतियार प्राप्त गर्न नदिने अमेरिकी नीति दोहोर्याएका छन्। उनले अमेरिकी कारबाहीका कारण इरानको सैन्य र आर्थिक क्षमतामा ठूलो असर परेको दाबी गर्दै वार्तामार्फत सम्झौताको सम्भावनासमेत उल्लेख गरेका छन्। साथै, सम्झौता नभए इरानविरुद्ध थप कडा सैन्य कारबाही गर्न सक्ने चेतावनी दिएका छन्।
सम्बोधनको सुरुवाती भागमा ट्रम्पले अमेरिकी अर्थतन्त्र, कर नीति, आप्रवासन नियन्त्रण र सुरक्षा अवस्थालगायत घरेलु विषयमा आफ्नो प्रशासनको उपलब्धि प्रस्तुत गरेका थिए। त्यसपछि उनले अन्तर्राष्ट्रिय सुरक्षा, इरान, युक्रेन युद्ध र विश्व व्यवस्थासम्बन्धी विषय उठाएका थिए।
यस वर्षको महासभा अमेरिका–इरान द्वन्द्व, युक्रेन युद्ध, जलवायु परिवर्तन, कृत्रिम बुद्धिमत्ता र संयुक्त राष्ट्रसङ्घको भविष्यका विषयमा केन्द्रित छ। अमेरिकी प्रशासनले संयुक्त राष्ट्रसङ्घको भूमिका र अमेरिकी सार्वभौमिकतासम्बन्धी विषयमा आलोचनात्मक धारणा राख्दै आएको छ। महासभाको यस वर्षको मूल विषय भने ‘विश्वास पुनर्स्थापना, रूपान्तरण व्यवस्थापन : सबैका लागि परिणाम दिने संयुक्त राष्ट्रसङ्घ’ रहेको छ।
महासभामा सम्बोधनपछि ट्रम्पले विभिन्न राष्ट्रका नेताहरूसँग द्विपक्षीय तथा समूहगत भेटवार्ता गर्ने कार्यक्रम रहेको छ। युक्रेनका राष्ट्रपति भोलोदिमिर जेलेन्स्कीसहित बेलायत, भेनेजुएला, डेनमार्क, ग्रिनल्यान्ड तथा खाडी क्षेत्रका नेताहरूसँग भेटवार्ता गर्ने उनको कार्यक्रम छ।
प्रतिक्रिया 0