Sustainable Finance | Financial Literacy | Sustainable Future
एप्पलको नयाँ सीईओ बन्दै जोन टर्नस
आइतबार, १४ भदौ २०८३, राति ९:५६
विश्वकै चर्चित प्रविधि कम्पनी एप्पलको प्रमुख कार्यकारी अधिकृत (सीईओ)का रूपमा जोन टर्नसले जिम्मेवारी सम्हाल्न लागेसँगै कम्पनीको व्यवस्थापन टोली र संस्थागत संस्कृतिमा परिवर्तन गर्नु उनका लागि प्रमुख चुनौती बन्ने देखिएको छ।
एप्पलले यसअघि घोषणा गरेअनुसार टर्नसले सेप्टेम्बर १, २०२६ देखि कम्पनीको सीईओको जिम्मेवारी सम्हाल्नेछन्। हाल सीईओ रहेका टिम कुक सोही दिनदेखि एप्पलको कार्यकारी अध्यक्ष बन्नेछन्। टर्नस हाल एप्पलमा हार्डवेयर इन्जिनियरिङका वरिष्ठ उपाध्यक्षका रूपमा कार्यरत छन्।
एप्पलमा दुई दशकभन्दा लामो अनुभव भएका टर्नस कम्पनीका उत्पादनको हार्डवेयर विकास र डिजाइनमा महत्वपूर्ण भूमिकामा रहँदै आएका छन्। उनले सन् २००१ मा एप्पलको उत्पादन डिजाइन टोलीबाट आफ्नो करियर सुरु गरेका थिए। सन् २०२१ मा उनी हार्डवेयर इन्जिनियरिङका वरिष्ठ उपाध्यक्ष बनेका थिए।
ब्लूमबर्गका प्रविधि विश्लेषक मार्क गुरमनका अनुसार टर्नससामु सबैभन्दा ठूलो चुनौतीमध्ये एक दशकौँदेखि एप्पलको संस्थागत संस्कृति र कार्यशैलीलाई प्रभाव पार्दै आएको व्यवस्थापन टोलीलाई पुनर्गठन गर्नु हुनेछ। नयाँ सीईओले कम्पनीको स्थापित व्यवस्थापन शैलीमा कति परिवर्तन गर्छन् र नेतृत्व टोलीमा कस्ता नयाँ प्राथमिकता ल्याउँछन् भन्ने विषयलाई प्रविधि उद्योगले चासोका साथ हेरिरहेको छ।
टिम कुकको नेतृत्वमा एप्पलले लामो समयदेखि स्थिर र सफल व्यवस्थापन शैली कायम गर्दै आएको छ। अब टर्नसले त्यसको निरन्तरता कायम राख्दै नयाँ सोच, नेतृत्व शैली र प्रविधिगत प्राथमिकतालाई कसरी अघि बढाउँछन् भन्ने उनको कार्यकालको महत्वपूर्ण पक्ष बन्नेछ।
प्रतिक्रिया 0