Sustainable Finance | Financial Literacy | Sustainable Future
ग्यास आपूर्ति सहज बनाउन कम्पनी फरक भए पनि सिलिन्डर साट्ने व्यवस्था मिलाउन सरकारको निर्देशन
बुधबार, २४ भदौ २०८३, दिउँसो ३:१५
काठमाडौं । काठमाडौं उपत्यकामा एलपी ग्यासको आपूर्ति सहज बनाउन एक कम्पनीको सिलिन्डर अर्को कम्पनीको सिलिन्डरसँग साटेर ग्यास उपलब्ध गराउने व्यवस्था मिलाउने विषय अघि बढाइएको छ।
भोटेकोशी नदीमा आएको बाढीका कारण पृथ्वी राजमार्गको कृष्णभीर क्षेत्रमा सडक अवरुद्ध हुँदा ग्यास आपूर्ति प्रणाली प्रभावित भएपछि उपत्यकामा आपूर्ति सहज बनाउन यस्तो वैकल्पिक व्यवस्था अघि सारिएको हो। उद्योग, वाणिज्य तथा आपूर्तिमन्त्री गौरीकुमारी यादवले उपभोक्तालाई सहज रूपमा ग्यास उपलब्ध गराउन सम्बन्धित निकायसँग आवश्यक समन्वय गरी व्यवस्था मिलाउन निर्देशन दिएकी छन्।
प्रस्तावित व्यवस्थाअनुसार उपभोक्ताले आफूले नियमित रूपमा प्रयोग गर्दै आएको कम्पनीको सिलिन्डर उपलब्ध नभएको अवस्थामा अर्को कम्पनीको सिलिन्डरमार्फत ग्यास लिन सक्ने व्यवस्था मिलाउने तयारी गरिएको छ। यसबाट तत्कालीन आपूर्ति असहजता कम गरी उपभोक्तालाई राहत पुग्ने अपेक्षा गरिएको छ।
यस विषयमा नेपाल आयल निगम तथा सम्बन्धित ग्यास उद्योग र डिलर/व्यवसायीसँग समन्वयको प्रक्रिया अघि बढाइएको छ। तर, प्रस्तावित व्यवस्था हालसम्म कार्यान्वयनमा आइसकेको छैन। यसको कार्यान्वयन मिति, सिलिन्डर साटासाटको विस्तृत प्रक्रिया तथा सम्बन्धित कम्पनी र डिलरको भूमिकाबारे आवश्यक निर्णय हुन बाँकी रहेको छ।
त्यसैले उपभोक्ताले तत्कालै जुनसुकै कम्पनीको सिलिन्डर साटेर ग्यास लिन सक्ने अवस्था नरहेको र व्यवस्था कार्यान्वयनमा आएपछि मात्र सो सुविधा उपलब्ध हुने देखिन्छ। यसको कार्यान्वयनका लागि सम्बन्धित निकायबीच थप समन्वय तथा व्यवस्थापकीय तयारी आवश्यक पर्ने भएकाले केही समय लाग्न सक्नेछ।
मन्त्री यादवले ग्यास आपूर्ति सहज बनाउन सम्बन्धित निकायलाई सक्रिय रूपमा काम गर्न निर्देशन दिएकी छन्। साथै, कृत्रिम अभाव सिर्जना गर्ने, उपभोक्तालाई अनावश्यक दुःख दिने वा आपूर्ति व्यवस्थामा अनियमितता गर्ने पक्षमाथि प्रचलित कानुनअनुसार कारबाही गरिने चेतावनीसमेत दिइएको छ।
प्रस्तावित सिलिन्डर साटासाट व्यवस्था कार्यान्वयनमा आएमा निश्चित ब्रान्डको सिलिन्डर उपलब्ध नभएको अवस्थामा उपभोक्ताले अर्को कम्पनीको सिलिन्डरमार्फत ग्यास प्राप्त गर्न सक्नेछन्। यसले आपूर्ति अवरोधका समयमा उपभोक्तालाई थप विकल्प उपलब्ध गराउने अपेक्षा गरिएको छ।
प्रतिक्रिया 0