Sustainable Finance | Financial Literacy | Sustainable Future
पुँजी बजारमा निरन्तर गिरावट, कारण खोज्दै प्रतिपक्ष
सोमबार, ८ भदौ २०८३, बिहान ११:५०
काठमाडौं । निर्वाचनपछि पुँजी बजारमा सुधार आउने अपेक्षा गरिए पनि बजार निरन्तर कमजोर बनेपछि नेपाली कांग्रेसले यसको कारण खोज्न विज्ञसँग परामर्श थालेको छ।
कांग्रेस सभापति गगन थापाले निर्वाचनपछि पनि पुँजी बजार ओरालो लाग्नुको कारण पहिचान गरी आवश्यक समाधानका उपाय खोजिने बताएका छन्। बजारको पछिल्लो अवस्थाबारे विज्ञसँग छलफल गरी प्राप्त सुझावका आधारमा प्रतिवेदन तयार पारेर सांसदहरूलाई उपलब्ध गराउने तयारी कांग्रेसको छ।
कांग्रेसले आयोजना गरेको ‘सुवर्ण शमशेर आर्थिक श्रृंखला’ को तेस्रो सत्रमार्फत पुँजी बजारसहित समग्र आर्थिक विषयमा विज्ञसँग छलफल गरिएको हो। आर्थिक तथा वित्तीय विषयमा सांसदहरूको बुझाइ थप बलियो बनाउने र संसदमा नीतिगत तथा वित्तीय मुद्दा प्रभावकारी रूपमा उठाउन सक्ने वातावरण बनाउने उद्देश्यले कार्यक्रम आयोजना गरिएको कांग्रेसले जनाएको छ।
निर्वाचनपछि राजनीतिक स्थिरता र नयाँ सरकारसँगै बजारमा सकारात्मक प्रभाव पर्ने अपेक्षा गरिएको थियो। तर अपेक्षाविपरीत बजार कमजोर बनेपछि लगानीकर्ताको मनोविज्ञान, नीतिगत वातावरण, तरलता, ब्याजदर तथा अन्य आर्थिक कारणबारे प्रश्न उठ्न थालेका छन्।
कांग्रेसले विज्ञहरूको सुझावका आधारमा बजारमा देखिएको कमजोरीका कारण पहिचान गरी तत्काल सुधारका लागि आवश्यक नीतिगत उपायबारे समेत अध्ययन गर्ने जनाएको छ।
पुँजी बजारमा देखिएको गिरावटलाई केवल सेयर बजारको उतारचढावका रूपमा नभई लगानी वातावरण, वित्तीय नीति र अर्थतन्त्रप्रतिको विश्वाससँग जोडेर हेर्नुपर्ने आवश्यकता विज्ञहरूले औंल्याएका छन्। यसले आगामी दिनमा संसदमा पुँजी बजार र वित्तीय क्षेत्रसम्बन्धी नीतिगत बहसलाई थप प्राथमिकता दिने संकेत गरेको छ।
कांग्रेसले विज्ञ परामर्शबाट प्राप्त निष्कर्षलाई समेटेर तयार गर्ने प्रतिवेदनमार्फत पुँजी बजार सुधारका लागि आवश्यक नीतिगत हस्तक्षेपबारे सांसदहरूलाई जानकारी गराउने तयारी गरेको छ।
प्रतिक्रिया 0