Sustainable Finance | Financial Literacy | Sustainable Future
महँगीको दबाबले विश्वका केन्द्रीय बैंक ब्याजदर बढाउँदै
अस्ट्रेलियामा १८ वर्षयताकै उच्च ब्याजदर
बिहीबार, १९ कार्तिक २०८३, राति ११:१४
काठमाडौं । विश्वका प्रमुख केन्द्रीय बैंकहरू महँगी नियन्त्रण गर्न ब्याजदर बढाउने नीतिमा अघि बढेका छन्। पछिल्लो समय ऊर्जा मूल्यमा भएको वृद्धि र मध्यपूर्वको द्वन्द्वका कारण मुद्रास्फीतिको दबाब बढेपछि विभिन्न देशका केन्द्रीय बैंकहरूले मौद्रिक नीति कसिलो बनाइरहेका छन्। अन्तर्राष्ट्रिय समाचार संस्था रोयटर्सका अनुसार यसै साता बेलायत र स्विडेनका केन्द्रीय बैंकले सन् २०२३ पछि पहिलोपटक ब्याजदर वृद्धि गरेका छन्। त्यस्तै, अस्ट्रेलियाको केन्द्रीय बैंकले सन् २०२६ मा पाँचौँपटक ब्याजदर बढाएको छ।
बेलायतको केन्द्रीय बैंक (Bank of England) ले बिहीबार नीतिगत ब्याजदर ३.७५ प्रतिशतबाट बढाएर ४ प्रतिशत पुर्याएको छ। तीन वर्षभन्दा बढी समयपछि गरिएको यो पहिलो ब्याजदर वृद्धि हो। मध्यपूर्वको द्वन्द्व लम्बिएर ऊर्जा मूल्यमा दबाब कायम रहेमा थप ब्याजदर वृद्धि गर्नुपर्ने अवस्था आउन सक्ने बैंकले संकेत गरेको छ। बैंकले सन् २०२७ को मध्यसम्म बेलायतको मुद्रास्फीति करिब ५ प्रतिशत पुग्न सक्ने प्रक्षेपणसमेत गरेको छ।
त्यस्तै, अस्ट्रेलियाको केन्द्रीय बैंक (Reserve Bank of Australia) ले नीतिगत ब्याजदर बढाएर ४.८५ प्रतिशत पुर्याएको छ। यो पछिल्लो १८ वर्षयताकै उच्च दर हो। यद्यपि, ब्याजदर वृद्धिसम्बन्धी निर्णयमा मत विभाजन देखिनु र बैंकको तुलनात्मक रूपमा नरम संकेतका कारण थप ब्याजदर वृद्धि तत्काल नहुन सक्ने अनुमान गरिएको छ। स्विडेनको केन्द्रीय बैंकले पनि बुधबार ब्याजदर २ प्रतिशत पुर्याएको छ। सन् २०२३ पछि पहिलोपटक गरिएको उक्त वृद्धिपछि थप वृद्धि हुन सक्ने संकेत गरिएको छ।
यसैबीच, नर्वेको केन्द्रीय बैंकले ब्याजदर यथावत् राखे पनि मुद्रास्फीति नियन्त्रणका लागि आगामी दिनमा वृद्धि गर्न सकिने सम्भावना खुला राखेको छ। अमेरिकाको फेडरल रिजर्भ, युरोपेली केन्द्रीय बैंक (ईसीबी) र जापानको केन्द्रीय बैंकले भने पछिल्लो बैठकमा ब्याजदर परिवर्तन नगरी यथावत् राखेका छन्। यद्यपि, मुद्रास्फीतिको दबाब कायम रहे थप वृद्धि गर्न सकिने संकेत उनीहरूले दिएका छन्। अमेरिकामा आगामी डिसेम्बरमा ब्याजदर वृद्धि हुने सम्भावनालाई बजारले करिब ८० प्रतिशत मूल्यांकन गरेको रोयटर्सले उल्लेख गरेको छ।
न्युजिल्यान्डको केन्द्रीय बैंकले नीतिगत ब्याजदर २.७५ प्रतिशतमा यथावत् राखेको छ। तर डिसेम्बरमा वृद्धि हुन सक्ने सम्भावना उच्च रहेको संकेत गरिएको छ। क्यानडाले भने ब्याजदर ०.२५ प्रतिशत बिन्दुले बढाएर २.५ प्रतिशत पुर्याएको छ। स्विट्जरल्यान्डको केन्द्रीय बैंकले ब्याजदर शून्य प्रतिशतमा कायम राख्ने अपेक्षा गरिएको छ। समग्रमा ऊर्जा मूल्य, मध्यपूर्वको भू–राजनीतिक तनाव र मुद्रास्फीतिको अवस्थाले आगामी दिनमा विश्वका केन्द्रीय बैंकहरूको ब्याजदर नीति निर्धारण गर्ने देखिएको छ।
प्रतिक्रिया 0