Sustainable Finance | Financial Literacy | Sustainable Future
यूएईको केन्द्रीय बैंकद्वारा विदेशी बैंकलाई २० करोड दिराम जरिवाना
सीईओ र अनुपालन अधिकारीलाई ब्यक्तिगत जरिवाना
शनिबार, १४ कार्तिक २०८३, बिहान ८:५७
अबुधाबी । संयुक्त अरब इमिरेट्स (यूएई) को केन्द्रीय बैंकले नियामकीय अनुपालन तथा सम्पत्ति शुद्धीकरण नियन्त्रणसम्बन्धी व्यवस्थामा गम्भीर कमजोरी गरेको भन्दै एक विदेशी बैंकको यूएईस्थित शाखालाई २० करोड दिराम जरिवाना गरेको छ।
यूएईको केन्द्रीय बैंकले सन् २०२६ अक्टोबर ३० मा जारी गरेको प्रेस विज्ञप्तिअनुसार बैंकको सञ्चालन तथा वित्तीय कारोबारसम्बन्धी निरीक्षणका क्रममा सम्पत्ति शुद्धीकरण नियन्त्रण, आतंकवादी गतिविधिमा वित्तीय लगानी रोकथाम, गैरकानुनी संगठनलाई वित्तीय सहयोग हुन नदिने व्यवस्था, संस्थागत सुशासन, नियामकीय अनुपालन तथा अन्तर्राष्ट्रिय प्रतिबन्धसम्बन्धी व्यवस्थामा गम्भीर कमजोरी फेला परेको थियो।
यसका साथै बैंकका प्रमुख कार्यकारी अधिकृतलाई ५ लाख दिराम र अनुपालन तथा सम्पत्ति शुद्धीकरणसम्बन्धी प्रतिवेदन हेर्ने प्रमुख अधिकारीलाई ३ लाख दिराम व्यक्तिगत जरिवाना गरिएको केन्द्रीय बैंकले जनाएको छ।
केन्द्रीय बैंकले सम्बन्धित बैंकलाई स्वतन्त्र निकायबाट प्रमाणीकरण हुने गरी अनिवार्य सुधारात्मक कार्यक्रम सञ्चालन गर्न निर्देशन दिएको छ। साथै, बैंकका प्रमुख कार्यकारी अधिकृत र प्रमुख अनुपालन अधिकारीको पदअनुकूल योग्यता, क्षमता तथा उपयुक्तताको पुनर्मूल्यांकन गर्न पनि निर्देशन दिइएको छ।
केन्द्रीय बैंकका अनुसार बैंक तथा वित्तीय संस्थाले सम्पत्ति शुद्धीकरण नियन्त्रण, आतंकवादी गतिविधिमा वित्तीय लगानी रोकथाम तथा सम्बन्धित कानुनी र नियामकीय व्यवस्थाको पूर्ण पालना गर्नुपर्छ। वित्तीय प्रणालीको पारदर्शिता, विश्वसनीयता र स्थायित्व कायम राख्न नियामकीय अनुपालनमा कुनै सम्झौता गर्न नसकिने नियामकको भनाइ छ।
यस कारबाहीले बैंक तथा वित्तीय संस्थामा संस्थागत सुशासन, जोखिम व्यवस्थापन र नियामकीय अनुपालनको महत्त्वलाई पुनः उजागर गरेको छ।
केन्द्रीय बैंकको आधिकारिक प्रेस विज्ञप्तिमा जरिवाना गरिएको विदेशी बैंकको नाम र त्यसको देश खुलाइएको छैन।
प्रतिक्रिया 0