वासिङ्टन । विश्व बैंक समूहले नोबेल पुरस्कार विजेता अर्थशास्त्री माइकल क्रेमरलाई प्रमुख अर्थशास्त्री (Chief Economist) तथा विकास अर्थशास्त्रका वरिष्ठ उपाध्यक्ष (Senior Vice President for Development Economics) नियुक्त गरेको छ। विश्व बैंक समूहका अध्यक्ष अजय बङ्गाले बुधबार उनको नियुक्ति घोषणा गरेका हुन्। क्रेमरले १ अक्टोबर २०२६ देखि जिम्मेवारी सम्हाल्नेछन्। 

क्रेमरले विश्व बैंक समूहको अनुसन्धान, तथ्यांक तथा विश्लेषणात्मक कार्यसूचीको नेतृत्व गर्नेछन्। विश्व बैंकका अनुसार विकासका चुनौती समाधान गर्न अनुसन्धान र प्रमाणमा आधारित उपाय विकास तथा तिनलाई ठूलो स्तरमा कार्यान्वयन गर्न उनको अनुभव उपयोगी हुने अपेक्षा गरिएको छ। रोजगारी सिर्जना, निजी पुँजी परिचालन, स्वास्थ्य तथा शिक्षा सेवाको विस्तार र नयाँ प्रविधिको प्रयोग उनका प्राथमिकताका विषयमध्ये रहनेछन्। 

क्रेमर हाल शिकागो विश्वविद्यालयको Development Innovation Lab का निर्देशक तथा University Professor हुन्। उनले विकास अर्थशास्त्र, आर्थिक वृद्धि, प्रविधिगत परिवर्तन, स्वास्थ्य, शिक्षा, कृषि, वित्त र पानीसम्बन्धी विषयमा अनुसन्धान गरेका छन्। सन् २०१९ मा गरिबी न्यूनीकरणका लागि प्रयोगात्मक अनुसन्धान विधि विकास गरेको योगदानका लागि अब्हिजित बनर्जी र एस्थर डुफ्लोसँग संयुक्त रूपमा अर्थशास्त्रतर्फको नोबेल पुरस्कार पाएका थिए। 

उनको अनुसन्धानबाट विकसित विभिन्न कार्यक्रमले विकासशील देशमा ठूलो संख्यामा मानिसलाई प्रभाव पारेको विश्व बैंकले जनाएको छ। खोप पहुँच विस्तार, बालबालिकामा जुका नियन्त्रण, डिजिटल कृषि तथा एआईमा आधारित कृषि मौसम पूर्वानुमानलगायत क्षेत्रमा उनको काम प्रयोग भएको छ। विश्व बैंकका अनुसार उनको अनुसन्धानबाट प्रभावित कार्यक्रमले अफ्रिका र दक्षिण एसियामा समेत ठूलो जनसंख्यालाई समेटेको छ।