इटहरी । युवालाई बजारको मागअनुसार व्यावहारिक सीप प्रदान गर्दै रोजगारीका अवसरसँग जोड्ने उद्देश्यका साथ सुनसरीको इटहरीमा आजदेखि ‘सीप तथा रोजगार मेला–२०८३’ सुरु भएको छ।

युवा तथा श्रम मन्त्रालयको आयोजनामा सुरु भएको मेला असोज २० गतेसम्म सञ्चालन हुनेछ। मेलाको मुख्य उद्देश्य सीप भएका युवालाई रोजगारदातासँग जोड्नुका साथै सीपको अभावमा रोजगारी पाउन कठिनाइ भोगिरहेका युवालाई आवश्यक तालिम तथा परामर्श उपलब्ध गराउनु रहेको छ।

मेलामा ६५ वटा स्टल राखिएका छन्। विभिन्न क्षेत्रका रोजगारदाता, तालिम प्रदायक संस्था तथा सम्बन्धित निकायको सहभागिता रहेको मेलामा युवालाई रोजगारी, सीप विकास, तालिम तथा उद्यमशीलतासम्बन्धी जानकारी प्रदान गरिनेछ।

उपलब्ध विवरणअनुसार मेलामार्फत विभिन्न उद्योग तथा प्रतिष्ठानमा ६ हजारभन्दा बढी जनशक्तिको माग गरिएको छ। सरकारी ‘सीप तथा रोजगार मेला’ पोर्टलमा पछिल्लो विवरणअनुसार ६ हजार १८८ जनाका लागि रोजगारी माग देखिएको छ।

मेलाको अवधिमा १० वटा विषयगत ट्रेडमा पाँचदिने व्यावहारिक तालिम सञ्चालन गरिनेछ। श्रम बजारमा माग भएका सीप सिकाएर युवालाई तालिमपछि सम्भावित रोजगारीका अवसरसँग जोड्ने लक्ष्य राखिएको छ।

मेलामा रोजगार मिलान, सीप प्रोफाइलिङ, सूचना तथा परामर्श, तालिम तथा उद्यमशीलतासम्बन्धी सेवा उपलब्ध गराइनेछ। रोजगार खोजिरहेका युवाले आफ्नो सीप, योग्यता र अनुभवअनुसार रोजगारदातासँग प्रत्यक्ष सम्पर्क गर्न तथा उपलब्ध रोजगारीका अवसरमा आवेदन दिन सक्नेछन्।

त्यस्तै, रोजगारदाताले आवश्यक जनशक्ति पहिचान गरी दक्ष तथा अर्धदक्ष कामदारसँग प्रत्यक्ष सम्पर्क गर्न सक्ने व्यवस्था गरिएको छ। यसले रोजगारदाता र रोजगारी खोज्ने युवाबीचको दूरी घटाउन सहयोग पुग्ने अपेक्षा गरिएको छ।

सरकारले युवालाई स्वदेशमै आवश्यक सीप हासिल गरी रोजगारी तथा स्वरोजगारका अवसरमा जोड्ने उद्देश्यसहित मेला आयोजना गरेको हो। सीप विकास, रोजगार मिलान र व्यावहारिक तालिमलाई एकै ठाउँमा जोडिएको यस कार्यक्रमले स्थानीय श्रम बजारको आवश्यकता र उपलब्ध जनशक्तिबीच समन्वय बढाउने अपेक्षा गरिएको छ।