हाम्रो बैंकिङ । नेपाली बजारमा सुनचाँदीको मूल्यमा गिरावट आउने क्रमले निरन्तरता पाएको छ। साताको पहिलो कारोबार दिन आइतबार पनि सुन र चाँदी दुवैको मूल्य घटेको हो।
नेपाल सुनचाँदी व्यवसायी महासंघका अनुसार आज सुनको मूल्य प्रतितोला २ हजार ८०० रुपैयाँले घटेको छ। यससँगै छापावाल सुनको मूल्य प्रतितोला २ लाख ४२ हजार ६०० रुपैयाँ कायम भएको छ।
अघिल्लो कारोबार दिन शुक्रबार सुन प्रतितोला २ लाख ४५ हजार ४०० रुपैयाँमा कारोबार भएको थियो। शुक्रबारको तुलनामा आज सुनको मूल्यमा उल्लेख्य गिरावट आएको हो।
त्यस्तै, चाँदीको मूल्य पनि घटेको छ। आज चाँदी प्रतितोला ४५ रुपैयाँले घटेर ३ हजार ६५ रुपैयाँ कायम भएको छ। अघिल्लो कारोबार दिन शुक्रबार चाँदी प्रतितोला ३ हजार ११० रुपैयाँमा कारोबार भएको थियो।
पछिल्लो समय अन्तर्राष्ट्रिय बजारमा सुनचाँदीको मूल्यमा देखिएको उतारचढावको प्रभाव नेपाली बजारमा समेत परेको छ। अन्तर्राष्ट्रिय बजारमा सुन तथा चाँदीको माग, अमेरिकी डलरको मूल्य, ब्याजदर र विश्वव्यापी आर्थिक तथा राजनीतिक परिस्थितिले यी धातुको मूल्यलाई प्रभावित पार्ने गर्छन्।
सुनचाँदीको मूल्यमा आएको गिरावटले उपभोक्ता, सुनचाँदी व्यवसायी तथा लगानीकर्ताको चासो बढाएको छ। आगामी दिनमा अन्तर्राष्ट्रिय बजारको अवस्था र विनिमय दरका आधारमा नेपाली बजारमा समेत मूल्यमा थप उतारचढाव आउन सक्नेछ।
प्रतिक्रिया 0